زندگی بیحد مختصر ہے، یہ کوئی ریہرسل نہیں چل رہی کہ کسی کی غلطی یا غلط فیصلے کی سزا کوئی دوسرا زی روح چپ چاپ بھگت کر اپنی زندگی کو جہنم بناتا رہے۔ بزرگ بھی اکثر و بیشتر غلطیاں کرتے ہیں اور اکثر انھیں بھی درستی کی ضرورت ہوتی ہے۔ محض کسی کے احترام میں اپنی زندگی تیاگ دینا اولڈ فیشن ہو چکا ہے۔
بنیادی طور پر والدین اٹھارہ سال کی عمر تک کے بچے کو پالنے کے ذمے دار ہیں۔ اور یہ بچوں پر کوئی احسان ہرگز نہیں بلکہ یہ اُن بچوں کو اِس دنیا میں لانے کے فیصلے کا کفارہ ہے کہ انھیں اب دنیا کی باگ ڈور سنبھالنے کے قابل بنانا بھی انھی والدین کی ذمے داری ہے جو اسے دنیا میں لیکر آنے کی وجہ بنے۔
مگر ہمارے ہاں والدین خود کو بچوں کا مالک تصور کرتے ہیں۔ ہمارے ہاں کا فنانشل سماجی سسٹم اسقدر کھوکھلا ہے کہ یہاں بچہ پیدا کرنے کا بنیادی محرک ہی دراصل اپنے "بڑھاپے کا سہارا" پیدا کرنا ہوتا ہے۔ جبھی ہر کسی کو لڑکا چاہئے جو کماؤ پوت بن سکے۔ وہ اپنے بڑھاپے کے اس سہارے کو اپنے بڑھاپے تک سنبھال سنبھال کے رکھنا چاہتے ہیں۔ جبھی لاشعوری طور پر بچے کو آزاد ہوتا یا فیصلے کرتا دیکھنا ہی نہیں چاہتے، اور اٹھارہ سال کے بعد بھی ان کی زندگی کا ہر فیصلہ کرنا اپنا حق سمجھتے ہیں۔ انگنت زندگیاں ایسے ہی متصادم فیصلوں کی ںذر ہو جاتی ہیں
اِن شارٹ ہمارے ہاں insecurities کا کلچر رائج ہے، والدین خود بھی insecure ہوتے ہیں، اور وہ اپنی اولاد کو بھی اپنے بغیر insecure رہنے کا عادی بناتے ہیں۔

 ہم اپنے نوجوانوں کو سمجھانے میں ناکام رہے ہیں کہ زندگی اسقدر بے وقعت نہیں جتنی انھیں محسوس ہو رہی ہے۔ مزید یہ کہ ہم بھاشن دیتے ہیں کہ خدا کے ہاں دیر ہے اندھیر نہیں۔ بہتری آئے گی۔ امید قائم رکھو۔ محنت جاری رکھو وغیرہ وغیرہ ۔۔۔ اب اس بے حس اور اخلاقی طور پر پاتال پذیر معاشرے میں ہمیں خود اپنی یہ باتیں بے وزن معلوم ہونے لگی ہیں۔ جب بار بار کی امید کے بعد بھی مایوسی اور اندھیرا ہی مقدر دکھائی دیتا ہے تو زندگی دھندلی اور اسکے لوازمات بے معنی معلوم ہوتے ہیں

کیا آپ نے کبھی اس عورت کی اذیت کا اندازہ کیا جسے سگریٹ حتی کہ اسکی تک بدبو سے بھی چڑ ہوتی ہے مگر اُسے ساری زندگی  کسی چَین سموکر کیساتھ گزارہ کرنا پڑتا ہے اورنام نہاد کمپرومائز کی بدولت وہ علیحدگی کا تصور بھی نہیں کر سکتی 

ہم سب انسان ایک جگسا پزل (Jigsaw Puzzle) کی طرح ہیں، ہم بہت سے ٹکڑوں کیساتھ مل کر مکمل ہوتے ہیں۔ مگر اس پزل کے صرف کچھ ہی ٹکڑے ہمارے پاس ہوتے ہیں۔ بقیہ سبھی ٹکڑے ہمارے اردگرد ہمارے آشناؤں کے پاس، ہمارے کمرے، گلی محلے، شہر میں، اور جہاں جہاں ہماری اپروچ ہوتی ہے، وہاں وہاں اس پزل کے ٹکڑے جابجا بکھرے پڑے ہیں۔ ماسوائے ہمارے چاہنے والوں کے کسی کو اتنی فرصت اور دلچسپی نہیں ہوتی کہ ان ٹکڑوں کو جوڑے اور ہمیں مکمل سمجھ سکے۔
آپکی وفات کا سن کر پہلے تو مجھے سچ مچ بہت زیادہ افسوس ہو گا۔ اور شاید کچھ دن میں اس بارے میں کچھ بھی نہیں کہہ سکوں۔ پھر شاید کچھ دن بعد ایک کف افسوس ملتی پوسٹ کروں جس میں آپ سے متعلق ان تمام جذبات کا بے دھڑک اظہار ہو گا جو ابھی آپ سے کہنے کی ہمت نہیں ہے۔ مگر شاید ایک پوسٹ کر کے میری تسلی نہ ہو۔
شاید میں آپ کے قریبی دوستوں اور فیملی سے بھی رابطہ کر کے انھیں بتانے کی کوشش کروں کہ میری نظر میں آپ کیسے انسان تھے یا جس زاویے سے جسقدر بھی میں نے آپکو دیکھا اور سمجھا ہے وہ بتلا سکوں۔ شاید کہ میرے پاس آپکے پزل کا جو ٹکڑا ہے، اسے جوڑ کر کہیں کسی کی یاداشتوں میں آپکی تصویر اور کہانی مکمل ہو سکے۔