مجھے ایسا لگتا ھے کہ بچے قدرتی طور پر باپ کی طرف بہت زیادہ مائل ہوتے ہیں، مگر بچے کو نفسیاتی طور پر باپ سے دور رکھنے کا ایک سبب بذات_خود ماں کی محبت ہی ھوتی ھے. عورت کے خمیر میں شیئرنگ بہت کم ھے، نہ اپنے شوھر کو کسی کیساتھ شیئر ھوتا دیکھ پائے گی، نہ اپنی اولاد کو

 کچھ کیسز میں بیٹے کو باپ سے دور کرنے میں ماں کا بھی کردار ہوتا ھے. عموما باپ کو ماں کی طرح پروپیگنڈہ نہیں کرنا آتا .... باپ ماں کی طرح چونچلے اور ناز نہیں اٹھاتا. ..... جس کو ماں پیار پیار میں منفی پورٹرے کرنے میں کامیاب ھو جاتی ھے
بچہ غلطی کرے تو ماں سارا دن اسے باپ سے ڈراتی ھے .. کہ "آ لینے دو تمہارے ابو کو ... آج تمہاری خیر نہیں" ..... بچہ سارا دن باپ کے خوف سے کانپتا ھے ..... شام کو باپ آتا ھے ... ماں یوں شکایت لگاتی ھے جیسے بچے کی وکیل ھو ...... باپ کو غصہ آ جائے تو ماں آگے بڑھ کر بچے کو بچاتی بھی ھے، "چلئے جانے بھی دیں ... ابھی بچہ ہی تو ھے" ........................ یہ صرف ایک مثال ھے ... ایسی ہی بہت سے دوسری مادرانہ شفقت سے بھرپور حرکات سے ماں لاشعوری طور پر بچے کو باپ سے دور کرنے کا باعث بنتی ھے

میرے خیال میں کوئی بھی محبت بھرا تعلق، جو ہماری اپنی چھوٹی چھوٹی غلطیوں کی نذر ھو جاتا ھے، جب ھم خود اپنی نادانیوں کے باعث کسی کو خود سے دور کر بیٹھتے ھیں، تو ایسی محبت غیر مکمل رہ جاتی ھے. اس پیارے شخص کو ھم کھو چکتے ھیں، مگر ہماری اپنی غلطیوں کے باعث ادھورا رہ جانے والا وہ تعلق ہمیشہ اک پچھتاوے بھرا احساس بن کر ہمیشہ ہمارے ساتھ رہتا ھے. ھم خود اس ادھوری محبت کو اکثر یاد کرنا پسند نہیں کرتے، کیونکہ اسکی یاد ہماری انا کو کچوکے لگاتی ھے... اگر زندگی میں آگے بڑھنا ھے تو ایسی ادھوری کاوشوں کو بھول جانا ہی بہتر ھوتا ھے، لیکن زندگی میں بھولتا تو کچھ بھی نہیں. ہاں ھم جان بوجھ کر کچھ یاد نہ کرنا چاھیں، خود کو کہیں اور مصروف کر لیں، تو الگ بات ھے

کوشش" ، "سعی"، "محنت" کے بارے میں یہی سادہ سی بات سیکھی ھے کہ حاصلِ سفر کوئی "منزل" نہیں ھوتی، بلکہ "سفر" ھی ھوتا ھے.

 کامیابی ملی یا سفر رائیگاں گیا؟  "کامیابی" اور "رائیگاں" کی تعریف بھی ہر کسی کی اپنی اپنی الگ ہی ہوتی ھے. کیونکہ ہو سکتا ھے کہ وھی سفر جو دیکھنے والے کو رائیگاں لگ رھا ھے، مسافر کے لئے رائیگاں نہ ھو

میرے پیارا دوست اور سابقہ آفس کولیگ ، بلکہ اگر آل ٹائمز بیسٹ آفس کولیگ کہوں تو غلط نہ ھو گا. بہت ہی ھنس مکھ اور زندہ دل انسان ھے. خوش لباس، خوش خوراک، کھیلوں کا شوقین، جذبہ حب الوطنی سے سرشار، بھرپور انداز میں رشتے نبھانے والا، دوسروں کی مدد فرض سمجھ کے کرنے والا اور بہت زیادہ پازیٹو اور پراُمید انسان ہے. بُرے سے بُرے واقعہ میں بھی امید کا پہلو ڈھونڈ نکالتا ھے. میں دوستی کے آغاز میں اس بات کو زبیر کا انتہائی مثبت پواینٹ سمجھتا تھا، لیکن زبیر میں یہ خصوصیت ضرورت سے کچھ زیادہ ہی پائی جاتی ھے. اس نے اپنی ہی ایک تخیلاتی دنیا بنا رکھی ھے، اور زیادہ تر اپنی اسی دنیا میں خوش رھتا ھے، اور کبھی کبھی مابدولت کا دل کرے تو ہماری دنیا میں آ کر ہمیں بھی لفٹ کرا دیتے ھیں.

زبیر میں بہت سی خوبیاں ایسی ہیں جو میرے کسی دوست میں نہیں پائی جاتیں..... مثلا کھانا (serve) پیش کرنے کی خوبی، جب کبھی ھم سب دوست کھانے کو بیٹھیں، یہ سب کو serve کرے گا اور خود آخر میں کھائے گا، ھم اس کو لاکھ کہتے رھیں کہ زبیر تم بھی تو کھاؤ، مگر نہیں سنتا، اور اکثر اس کے حصے میں بچا کھچا آتا ھے. اس بات پر مجھے غصہ آتا ھے، مگر یہ نہیں سدھرنے والا.زبیر کو میوزک سے بہت لگاؤ ھے، حسن پرست بھی بہت ھے. فلمز اور ڈراموں کا بھی شوقین ھے. کھیلوں کا تو بہت زیادہ شوقین ھے. حد درجہ رومانٹک بھی ھے. تخلیقی صلاحیتوں سے مالا مال ھے. زبیر بہترین کمپیوٹر پروگرامر ھے، مختصر عرصے میں بہت کچھ سیکھنے کو ملا اس سے. بقول نعمان لاشاری اور سھیل اکبر، انہوں نے زبیر سے اچھا پروگرامر اپنی زندگی میں نہیں دیکھا.

زبیر کا دل صحیح معنوں میں سونے کا ھے، ایسا کبھی نہیں ہوا کہ میں نے زبیر کو مدد کے لئے پکارا ھو اور زبیر نے انکار کیا ھو، اور حیران کن طور پر سبھی دوست اس نکتے پر متفق ھیں.

کرکٹ میچ میں 17 گیندوں پر 60 رنز چاہئے ھوں، زبیر صاحب کہیں گے، ابھی دیکھنا چھکوں چوکوں کی بارش ہو گی اور ھم میچ جیت جائیں گے.... پھر 12 گیندوں پر 45 رنزرہ جائیں تو کہیں گے.... 12 * 4 = 48 ھوتا ھے ، ھم ابھی بھی جیت سکتے ہیں..... پھر جب آخری اورر کے 6 گیندوں پر 36 رہ جائیں، تب بھی کہیں گے ... 6 * 6 = 36 .. ھم میچ جیت جائیں گے.... آخری اوور کا پہلا بال ضائع ہو جائے تو پتا ھے کیا کہیں گے.؟؟؟؟ خرم 5*6 = 30 اور دیکھنا ایک نو بال ہو گا، فری ہٹ ملے گی جس پر چھکا لگے گا اور ھم ابھی بھی جیت سکتے ہیں. خیر میچ تو ویسے بھی ہار جانا ھوتا ھے، لیکن زبیر کے ان کومنٹس کے ساتھ ہارنے میں جو فرسٹریشن اور غصہ آتا ھے، اس کا عالم مت پوچھئے. اس پر قیامت یہ کہ میچ ہارنے پر میں پیچ و تاب کھا رھا ھوتا ھوں، اور جانتے ھیں زبیر صاحب کیا فرما رھے ہوتے ہیں؟؟؟ ___ "بٹ صاحب!!! کوئی گل نہیں..فکر نہ کرو..... ہار جیت هوندی رهندی اے..... اگلا میچ اسیں ضرور جیتاں گے" ____ اور بندہ پاگلوں کی طرح زبیر کو دیکھتا رہ جاتا ھے.

اپنی ایسی ہی خصوصیات کے باعث زبیر کی زندگی میں شامل تقریبا سبھی دوستوں کو زبیر کبھی تو معصوم بچہ لگنے لگتا ھے اور کبھی انتہا درجے کا غیر حقیقت پسند انسان..... کبھی کبھی جھنجھلاہٹ بھی ھوتی ھے اور اس پر پر غصہ بھی آنے لگتا ھے، حتی کہ زبیر کے ساتھ رہ رہ کر دھیرے دھیرے انسان کو خود اپنا آپ نیگیٹو بھی لگنا شروع ھو جاتا ھے ...
زبیر ہر کسی پر اعتبار کر لیتا ھے، ہر کسی کو دوست سمجھ بیٹھتا ھے، ہر کسی کی مدد کے لئے نکل پڑتا ھے، اور اپنے بھولپن میں نقصان بھی اٹھاتا ھے. اور انہی باتوں کو لے کر میرے زبیر سے ہلکی نوعیت کے کچھ نظریاتی اختلافات بھی ھیں کیونکہ اس نے رئیل لائف میں اپنی اس ایکسٹرا پازیٹو فطرت اور خلوص کی وجہ سے بار بار دھوکے کھائے ہیں، لوگوں نے اس کو بارہا استعمال کیا اور کچھ عرصہ پہلے تو اس نے بہت ہی دلبرداشتہ قسم کی چوٹ بھی کھائی.

اب اکثر میں ارادتاً اس کے سامنے نیگیٹو اور ریلیسٹک باتیں کرتا ھوں، کوشش کرتا ھوں کہ اس کے سامنے کوئی فینٹیسی کی بات نہ کروں، تلخ حقائق اور گراؤنڈ ریالٹی کا تذکرہ کر کے اس کے ذہن میں قائم فینٹسی کی دنیا کے اثر کو تھوڑا کم کروں. اب اکثر میں اس کے سامنے سچ بولتا ھوں، جو کہ اکثر یہ سننا نہیں چاہتا... اور اسی وجہ سے مجھ سے تھوڑا دور بھی ھوتا جا رھا. لیکن ابھی بھی معاملات ہمارے مکمل کنٹرول میں ہیں، تو زبیر !!!! "جانے نہیں دیں گے تجھے"....
خدا کرے زبیر کو خود میں کوئی بھی تبدیلی کئے بغیر وہ آئیڈیل دنیا حاصل ھو جائے، جو اس کے دل میں بستی ھے... آمین

زبانِ اردو اور نوابوں کے شہر لکھنؤ سے تعلق رکھنے والے ہمارے یہ گروپ ممبر اپنی وضح قطع اور گفتگو سے ہر صورت اک نواب ہی دِکھائی دیتے ھیں. اردو ادب بالخصوص شاعری ان کی رگ رگ میں خون بن کر دوڑ رھی ھے. اعلی ادبی پیمانوں سے نیچے کا کوئی بھی شعر اور شاعر ان کی برداشت سے باہر ھے، اکثر نئے شعراء ان کی کھری کھری تنقید کے نشتر سہنے کے بعد گروپ سے غیر حاضر رھنے لگتے ھیں. اور جس شاعر کے کلام سے یہ خوش ھو جائیں، اس کی اسقدر خوبصورت انداز میں حوصلہ افزائی فرماتے ھیں کہ وہ شاعر خود کو اردو ادب کی اھم ضرورت خیال کرنے لگے. جمالیاتی وعشقیہ شاعری ان کی پسندیدہ ترین ھے. فارسی سے بھی اردو ہی کی طرح محبت فرماتے ھیں.

انھیں ولی دکنی سے لے کر احمد فراز تک سبھی کلاسیک شعراء کے حالات زندگی یوں ازبر ھیں جیسے کسی کو اپنے قرض خواہوں کے نام. لگ بھگ سبھی پرانے شعراء کے دیوان انھیں زبانی یاد ھیں. فیس بک پر اپنے ہر ہر کمنٹ کے آخر میں ایک عدد شعر اور اپنے موجودہ شہر کا پتا بتانا لازمی خیال کرتے ہیں. شعر اصلاح و محبت میں جبکہ ایڈریس اس لئے کہ اگر کوئی بدلہ لینا چاھے تو اسے کوئی مشکل پیش نہ آئے. موصوف نے اپنے گھر پر ایک لائبریری کی صورت بیش بہا نایاب کتب کا ذخیرہ کر رکھا ھے. کتابیں صرف جمع نہیں کرتے، پڑھتے بھی ھیں. صرف دیوان غالب کے کوئی سترہ مختلف نسخے ان کے پاس موجود ھیں. اکثر کوئی غالب کے شعر کی تصحیح مانگ لے توفورا سبھی نسخوں سے جانچ کر بتا دیتے ھیں کہ سبھی نسخوں میں ایک سا لکھا ھے ان کی پسندیدہ فلمیں 'مغل اعظم' ، 'پاکیزہ' اور 'اُمراؤ جان' ان کی شخصیت کی صد فیصد درست عکاسی کرتی ہیں، اور ان فلموں کے تمام ڈائیلاگ انہیں ازبر ہیں. فلم "امراؤ جان" کے ڈائریکٹر سے تو بالمشافہ مل بھی چکے. اپنے گھر پر مشاعرے اور شعراء کی بیٹھک منعقد کرانا ان کا پسندیدہ مشغلہ ھے. سینس آف ھیومر انتہائی نفیس، مذاق بھی شاعری ہی میں کرنا پسند کرتے ھیں. غرض کہ ان کی شخصیت کا ہر ہر انگ شاعرانہ ھے.

اندازِ تکلم اور اندازِ طعام مخصوص نوابوں والا، نوابوں ہی کی طرح کا لباس زیب تن کرتے ھیں، انہی کی طرح نوادرات کی پرکھ اور سمجھ بھی. قرونِ اولیٰ کے دور کے برتن اکٹھے کرنے کا شوق ھے. انہی برتنوں میں گھر آئے مہمانوں کا سواگت عربی مٹھائیوں اور میٹھی گفتگو سے کرتے ھیں. نرم دِل اتنے ھیں کہ جن دنوں ارادتاً بھی فیس بک سے غائب ھوں، تب بھی کسی کی بیماری کی خبر سن کر دعائیہ کمنٹ ضرور کرتے ھیں. انکی زندہ دلی کا اس سے بڑھ کر ثبوت بھلا کیا ھو گا کہ یہ ہم جیسے غیر سنجیدہ حضرات کے درمیان اردو گفتگو پر ناصرف موجود ھیں بلکہ گفتگو بھی فرماتے ھیں. نڈر ایسے کہ رانا جیزی اور نعمان لاشاری کو ایک ساتھ مل کر بھی حواس باختہ نہ ہوئے
 
یہ ھستی دوسروں کی غلطیوں پر انہیں دل سے معاف کرنے کے عظیم جذبے سے سرشار ھے. اک خاص عہد کی نمائندگی کرتا یہ وہ لیجنڈ ھے جو اپنی شخصیت میں اپنا تمام گزرا دَور اور کلچر ساتھ ساتھ اُٹھائے پھرتا ھے. ایسی شخصیت اگلی پیڑیوں میں ناپید ھے. پچھلے سالوں میں یہ کینسر جیسے موزی مرض سے نبرد آزما بھی رھے. اللہ ان کو مکمل صحت دے اور ان کا مشفق سایہ اور بزرگانہ دستِ شفقت ہمیشہ ہمارے سروں پر قائم رکھے.... آمین

اردو گروپ کی بلاشبہ سب سے منفرد، دلبربا اور لائٹ ویٹ پرسنالٹی .... "جس میں وہ خاص بات ھے، جو کسی اور میں کہاں" .... جی نہیں میں کینڈی بسکٹ کی بات نہیں کر رھا، بلکہ اپنے حرف راز صاحب کا تذکرہ ھو رھا ھے، جو ھر گز کسی بسکٹ سے کم میٹھے نہیں.

موصوف بِنا کسی شک و شبہ کے، ان گنت خوبیوں کا مرکب ھیں. اول اور نمایاں ترین خصوصیت تو یہ ھے کہ ماشااللہ سے انتہائی خوبرو اور سمارٹ آدمی ھیں. غلطی سے اکاؤنٹس کے شعبے میں آ گئے. ورنہ یہ پیدا تو شوبز کی دنیا کے لئے ہوئے تھے ........ ان کا شمار ان مرد حضرات میں ھوتا ھے جو برملا اپنے حسن کا اقرار کرتے ھیں. اس ضمن میں اکثر کمنٹس میں خود اپنی بیوی کو خوش قسمت قرار دیتے بھی پائے گئے ھیں........ ستم یہ کہ موصوف کو اپنی خود کی فوٹو گرافی کا جنون کی حد تک شوق ھے. اپنی تصویر بنوانے کا کوئی لمحہ ضائع نہیں کرتے، جبھی فیس بک پر ان کی دفتری اوقات کے دوران لی گئی پروفیشنل تصاویر سے لے کر بارش میں بھیگے ہوئے بدن والی تصویریں تک موجود ھیں. چلو مانا بھئی کہ بندہ کسی لطیف جذبے کے زیر اثر اپنی خود کی تصویر فیس بک پر لگانے کا حق رکھتا ھے. لیکن یہ محترم نجانے اپنے حسن کو لے کر کس شبے کا شکار ھیں جو اپنی تصویروں میں اپنے ھمراہ ایسے ایسے حبشی نژاد افریقن حضرات کو لا کھڑا کرتے ھیں، جن کے ساتھ کھڑے ھو کر کوئی بھی خوامخواہ ہی زائد از ضرورت خوبصورت لگنے لگے....... اس پر دبئی کی تپتی دھوپ میں انکا رنگ ایسا سنہری گورا کہ خواتین تک ان کی فوٹو دیکھ دیکھ کر حسد میں مبتلا ھوتی رھتی ھیں. اکثر تو جل کر پوچھ بھی لیتی ھیں کہ "پائن !! تُسی ایڈے گورے کِنج ھو گئے؟" مجال ھے جو اس سوال پر ایک فیصد بھی کونفیوز ھوں، فورا بڑی ڈھٹائی سے جواب دیتے ھیں: ___"او میرے نانکے بٹ ہوندے نیں ناں .... ایس لئی"____ انکے اس جواب پر بیچارے بٹوں کی جو حالت زار ھوتی ھے، اسکو تو یہ دیکھنا بھی گوارا نہیں کرتے کہ موصوف اپنے کسی بھی جواب کے فورا بعد کالا چشمہ پہن کر ارد گرد کے جہان سے غافل ھو جاتے ھیں.

خدا نے ذھانت سے بھی خوب نوازا ھے. ادبی محافل میں اقبال ، فراز اور ن م راشد کی شاعری میں چھپے فلسفے ببانگ دُہل یوں بیان کرتے ھیں کہ ان تینوں شعراء کی روحیں بھی عالم ارواح میں انگشت بدنداں ھوتی ھیں کہ یہ باتیں تو انہوں نے بھی وہ اشعار لکھتے ہوئے نہ سوچی تھیں...... حافظہ کمال کا پایا ھے (کاش اپنا پایا ھوتا) .... جناب کو اتنی نظمیں اور اشعار زبانی یاد ھیں کہ شرطیہ یہی وہ فردِ واحد ھے، جو بیت بازی میں فضا رحمان صاحب کو مقابلے کی ٹکر دے سکتا ھے.
کھانے کے اتنے ہی دشمن ھیں، جتنا کہ توصیف احمد ...... فرق صرف یہ ھے کہ توصیف صاحب غذائی دھشت گردی سے دشمن کا قلعہ قمع کرتے ھیں اور حرف راز وقتِ طعام اپنی فوٹوز فیس بک پر شیئر کر کے...... جو بھی ڈش زندگی میں ایک بار کھا لی، وہ ان کی فیورٹ قرار پائی، جبھی پسندیدہ کھانوں کی تعداد 6 درجن کے لگ بھگ ھے.

آرٹ کے رسیا ھیں، خصوصا موسیقی میں کے ایل سہگل سے لے کر جسٹن بیئبر تک کوئی بھی ان کی سماعت کو چھوۓ بغیر نہیں گزر سکا. بہت سے گلوکاروں اور شعراء سے بالمشافہ ملاقات کا شرف بھی حاصل کر چکے. میوزک کی اتنی زیادہ سمجھ بوجھ رکھتے ھیں کہ محمد رفیع تک کے گانے میں غلطیاں ڈھونڈ لیتے ھیں. اردو گروپ میں میری پوسٹ کی ہوئی آڈیو غزلوں پر سب سے پہلا لائک اور کمنٹ انہی کا ھوتا تھا. کسی بھی گانے کے اسرار و رموز کی جانکاری رکھتے ہوئے یوں تنقید کرتے ھیں کہ گمان گزرتا ھے کہ کسی میوزکل ریالٹی شو میں جج کے فرائض نبھا رھے ھیں. اپنے چند احباب میں اکثر "اَنو ملک" کے نام سے بھی جانے جاتے ھیں.

لیکن حرف راز کی جو خوبیاں انکی سبھی خوبیوں سے ممتاز ھیں وہ یہ کہ ایک تو حد درجہ جینوئن اور مخلص شخص ھیں، اور دوسرے انتہائی مثبت اور زندہ دل انسان ھیں. ایک سال سے زائد عرصے سے ان کو نوٹس کر رھا ہوں، کبھی انکو کوئی اختلافی کمنٹ یا کسی کی دل آزاری کرتے نہیں پایا، کبھی بھی انکو کسی سے نفرت میں مبتلا محسوس نہیں کیا ..... (شعراء سے معزرت کے ساتھ) حرف راز کے لئے میں نے خود ایک شعر لکھا ھے:
علم رکھتے ہوئے بھی کبھی علم بگھارا نہیں
اس نے بُھول سے بھی کسی کا کچھ بگاڑا نہیں

ھم سب تو فیس بک پر اپنی ذات کے لئے آتے ھیں لیکن حرف راز ہمارے لئے آتے ھیں. کبھی کبھی تو صرف ہمیں ہنسانے اور چمکارنے کو آن لائن آ جاتے ھیں. اردو فیملی میں حرف راز کی کیا افادیت ھے اور ان کا کیا درجہ ھے اسکا ابھی ہمیں ادراک نہیں اور ھم اندازہ کر بھی نہیں سکتے کیونکہ جس بشر کی ہر ہر حرکت کا مقصد فقط دوسروں کی چند لمحوں کی مسکان ھو اسکا مرتبہ دوسرے بشر مقرر نہیں کرسکتے.

خاکہ نگاری کا مقابلہ شروع ہوا تو دل میں سوچا "خرّم میاں !! آسان کام تو سبھی کر لیتے ھیں، مقابلہ اگر جیتنا ھے تو کوئی مشکل اور انہونا کام کرڈالو. تمام ممبران اپنے دوستوں کا خاکہ لکھ رھے، ایسے میں کچھ مختلف اور مشکل  کرنے کی چاہ میں اپنے دشمن کا خاکہ لکھ ڈالو."  دشمن کا نام آتے ہی فیس بک پر اپنی واحد اور اکلوتی دشمن کا نام ہی میرے ذہن میں ابھرا .... سارہ رخسار ..... دل تو بالکل نہیں چاہ رھا تھا کہ کسی بھی طرح اپنے دشمن کی مقبولیت کا باعث بنوں لیکن مرتا کیا نہ کرتا، آخر مقابلہ جیتنے کی چاہ جو تھی، تو انتہائی مجبوری کے عالم میں محترمہ سارہ رخسار کے خاکے کا آغاز کیا.

 لیکن محترمہ نے اسقدر  خشک ، ڈیپریسنگ اور کسی بھی قسم کے لطیف جذبات سے مکمل طور پر عاری طبیعت پائی ھے کہ تین دن سے ان پر اک مذاقیہ خاکہ لکھنے کی کوشش کر رھا ہوں..... مجال ھے کہ کوئی ایک بھی شگفتہ لائن سارہ کو سوچ کر دماغ میں آئی ھو. الٹا دماغ کے کونوں کھدروں میں دوسرے دوستوں کے خاکوں کے لئے جو کچھ اچھا اچھا سوچ رکھا تھا، اسکو بھی سمجھو زنگ لگ گیا ھو. اب تو خدا سے یہی دعا ھے کہ یا تو یہ ادھورا خاکہ مکمل کر دے ... یا پھر ادھوری سارہ کو پورا کر دے.

  سارہ ہر لحاظ سے ایک گھمنڈی. جھگڑالو اور اکھڑ لڑکی ھے. مردوں کی عزت کرنا تو اس نے شائد سیکھا ہی نہیں. اور لڑکیوں سے اس کی بنتی نہیں. صحیح معنوں میں بِھڑوں کا چھتہ ھے، کسی بھی لمحے کسی سے بھی جھگڑا مول لے سکتی ھے. لانگ ٹرم دشمنی قائم رکھ سکتی ھے....... سکاٹ لینڈ میں رہنے کے باوجود رَج کے پینڈو واقع ہوئی ھے. اپنے اس احساس کو اپنے چہرے پر بھاری بھرکم میک اپ کی تہیں لگا کر دور کرنے کی کوشش کرتی ھے،   وہاں کی کرنسی پاؤنڈز میں کوئی بھی خرچہ کرنے سے پہلے حساب لگاتی ھے کہ یہ کتنے پاکستانی روپے بنتے ھیں. اچھی طرح تسلی کر لینے کے بعد پھر خرچہ پاؤنڈز میں ہی کرتی ھے.  ٹھنڈے ملک میں رہ کر دماغ پر برف کی تہہ جم چکی، اس کے تمام جمالیاتی احساسات منجمد اور سوچنے سمجھنے کی صلاحیت سُن ھو کر رہ گئی ھے. عجیب مخمصوں اور مصلحتوں کا شکار ھو کر خود کو کومپلیکیٹ بنانے کی کوششوں میں چار سال تک اپنی   شادی کو فیس بک کے دوستوں سے چھپائے رکھا، حالانکہ ارینجڈ میرج تھی.

  سارہ رخسار مجھے ایک آنکھ نہ بھانے کے باوجود بھی ہر لحاظ سے اک جینوئن شخصیت لگتی ھے، اس کی نفرت بھی  سراسر خالص ھے اور میرے نزدیک یہ بھی ایک پلس پوائنٹ ھے. انتہائی محب وطن ھے، پاکستان کی خاطر کسی سے بھی لڑ پڑے گی. تمام خامیوں کے باوجود دل کی تھوڑی سی اچھی بھی ھے،  اس لئے اس کو دل سے دور کرنا مشکل ھے... کیا کریں مجبوری ھے ایسے ایسے لوگوں کے ساتھ بھی گزارا کرنا پڑے گا صد شکر کے وہ اس خاکے کا جوابی حملہ خاکے کی شکل میں نہیں دے سکتی کیونکہ اگر خدا نے سارہ کو لکھنے کے فن سے آشنا کر رکھا ھوتا تو سوشل میڈیا پر کئی طوفان برپا ھو سکتے تھے

---
اپریل 2014

عمران قاضی کا تعلق ہانگ کانگ سے ھے. وہیں پیدا ہوئے، نوجوانی میں تعلیم کی غرض سے پاکستان آئے، اور پھر بیاہ کر واپس ہانگ کانگ چلے گئے. اب وہیں زندگی کا سفر جاری رکھے ہوئے ھیں. شعبہ تدریس سے منسلک ھیں.  ہماری ابھی تک ملاقات نہیں ہوئی، لیکن بس میرا اور عمران قاضی کا ایک غائبانہ کونیکشن ھے، عمران قاضی کو شائد محسوس نہ ھوتا ھو. لیکن اتنی عادت ھو گئی ھے اس شخص کی ..... جیسے ان کی فیس بک کی نپی تلی لائف اب اپنی لائف میں بھی فِٹ ھو چکی ھو .... سب پتا ھے عمران قاضی کی روٹین، ..... اس وقت سو رھے ھیں، اس وقت جاگ رھے ھیں.... کس وقت اپنے سکول میں ہوتے ہیں، ... کس وقت موبائل فون پر آن لائن ہوتے ھیں. کس وقت گھر کے کمپیوٹر پر بیٹھے ہوئے ھیں .........دن کے کس حصے میں وہ رومن میں کمنٹ لکھتے ھیں .... کس وقت اردو رسم الخط میں لکھیں گے. کس وقت سرسری جواب دیتے ھیں. کس وقت مفصل بات کرنے کا موڈ ھوتا ھے. ان کے کھانا کھانے کا وقت بھی .... اور ان کی باتیں.... جیسے سب کچھ پہلے ہی سے مجھے پتا ھے، لیکن پھر بھی انکے ھر ھر کومنٹ میں میرے لئے نئے پن کا احساس. کسی بھی موضوع پر پہلے ہی سے اندازہ ھوتا ھے عمران قاضی کتنا بولیں گے، کیا بولیں گے ........... ان کو کیا بات پسند آئے گی .. کیا پسند نہیں آئے گی..... کس ایشو پر جذباتی ھو سکتے ھیں. کس معاملے کو اگنور کرنے کی صلاحیت رکھتے ھیں ............. ایسے لگتا ھے عمران قاضی کا سارا انفارمیشن پروگرام مجھ میں فیڈ ھو چکا ھے

-
١٩ مارچ 2014

میرا ایک دوست انتہائی سادہ ھے، اس کو فاسٹ فوڈ وغیرہ بالکل پسند نہیں، اور نہ ہی وہ کبھی ان پر پیسا برباد کرتا ھے ......اس کے پاس پیسے کی کمی نہیں،لیکن بس اسکا لائف سٹائل انتہائی سادہ ھے ،اور اس بات سے میں اکثر اختلاف رکھا کرتا تھا ____ کہ یار کچھ تو اپنی ذات پر خرچ کیا کرو.  میں نے اتنے سالوں میں بہت کوشش کی کہ اس کو سمجھا سکوں کہ اے دیوانے دوست... کاش تم سمجھ سکو  کہ پیزا کتنے مزے کی ڈش ھے. مگر میں اسے قائل کرنے میں ناکام ہی رھا ______ وہ اپنی سادگی میں پیزا کھائے اور پسند کئے بغیر ہی اتنا مطمئن ھے _____ کہ کبھی کبھی مجھے اس کی سادگی اور اطمینان سے جلن ھونے لگتی ھے. .... جب اسکی روح ایک لگژری کئے بغیر ہی اتنی مطمئن ھے، اور میں وہ لگژری کر کے بھی اس قدر سکون میں نہیں، تو شاید میں ہی غلط ہوں.... ھم کسی پر اپنی سوچ اور اپنا آئیڈیل لائف سٹائل تھوپ نہیں سکتے. جو جیسے خوش اور پرسکون ھے اسکو ویسے ہی رہنے دینا چاہئے.

 ضروری تو نہیں کہ جس انداز کو آپ حاصل_زندگی سمجھ رھے ھوں، وہی اصل حقیقت ھو. ہر انسان کا پیمانہ فرق ھے، دیکھنے والی آنکھ اور محسوس کرنے والا دل فرق ھے. اور سب سے بڑھ کر ہر انسان کے ٹارگٹس فرق ھیں. جب ہر انسان کا  مطمئن ہونے کا لیول ہی فرق ھے تو ھم فیصلہ نہیں کر سکتے کہ کس کی روح اسکی موجودہ زندگی سے کس قدر سکھی اور شاد ھے.

آج خود ساختہ دکھوں والی بات کی تشریح کرنا چاہتا ھوں. دکھ تو ہر کسی کی زندگی میں ہوتے ہی ہیں. اس سے انکار نہیں. لیکن خود ساختہ دکھ بھی بہت بڑی حقیقت ہیں. ایسے لوگوں کی تعداد بھی کم نہیں.یہ وہ لوگ ہوتے ہیں جن کی اصل زندگی دوسروں کے مقابلے میں نسبتا بہتر ہی ہوتی ھے، بظاہر کوئی مسئلہ ہوتا نہیں. لیکن وہ اپنے آپ کو نارمل زون میں رکھنے کے لئے اپنے آپ کو ان مسائل کا شکار کر لیتے ہیں. یہ اصل میں دو مسائل ہیں. یا دو مراحل کہہ لیں.

میری رشتوں کی ڈکشنری میں بیوفائی، دھوکہ، جفا جیسے الفاظ موجود ہی نہیں ہیں. جذباتی رشتوں کو لے کر زیادہ تر لوگ مثبت ہی ہوتے ہیں، مثبت سوچنا چاہتے ہیں، مثبت طریقے سے ہی جینا چاہتے ہیں. میرا ماننا ھے کہ جذباتی تعلقات میں کوئی کسی کو دھوکہ نہیں دیتا، اگر دیتا ھے تو وہ انسان خود اپنے آپ کو کسی وقت میں دھوکہ دے رھا ھوتا ھے. ضرورت سے زیادہ سوچ کر، ضروت سے زیادہ جذباتی اور خوش گمانی میں مبتلا ہو کر _____ رشتے میں دوسرے فریق کی بساط سے بڑھ کر امید کرنا اصل میں خود سے دھوکہ ہے. خود سے بیوفائی ھے. جذباتی رشتے میں دوسرے فریق کو مورد_الزام ٹھہرانا میرے نزدیک کم ظرفی ھے.