جس دن کسی انسان کی سوچ میں انسانیت اور مذہب جداگانہ حیثیت اختیار کر جاتے ہیں، اسی دن سے اُس کی زندگی میں مذہب کی افادیت زیرو ہونا شروع ہو جاتی ہے۔ مذہب اگر ضابطہءِحیات ہے تو اسکا حیات بسر کرنے والوں کی سمجھ میں سمانا بھی اشد ضروری ہے۔ انسان بنیادی طور پر سہل پسند ہے، صدیوں کی جدوجہد کیساتھ ٹیکنالوجی کا حصول اُس کی اسی سہل پسندی کا مظہر ہے۔ مگر گزرتے وقت کیساتھ بڑھتی اپنی بے جا پیچیدگیوں سمیت غیرمصدقہ اور انگنت نان پریکٹیکل افسانوی مِتھس کے سبب مذہب عہدِ حاضر کی انسانی زندگی کیلئے غیر متعلقہ حیثیت اختیار کرتا چلا جا رہا ہے۔ حقیقت کی نظر سے دیکھیں تو جن علاقوں میں مذہب زندہ بھی ہے وہاں بھی ماڈرن اینٹرٹینمنٹ کے مواقع ناپید ہونے کے باعث اسکی حیثیت کلچرل ایکٹیویٹیز سے بڑھ کر کچھ بھی نہیں۔ یہ ایک الگ اور تلخ حقیقت ہے کہ باقی کی دنیا کی نسبت مذہبی کلچر کے نمائندہ علاقوں (ملکوں) کا شمار دنیا کے پسماندہ خطوں میں ہوتا ہے۔